Share

مالك؟؟



بتغاظ قوي لما حد - في الظروف المقندله دي - يقولي "مالك؟" .. "زعلان ليه ؟؟" .. "مكشر ليه ؟؟؟" ..
معلش يا عم اصل بلدنا حلوة وانا اللي رخم 
المفروض محدش يقولي "مالك؟" .. لكن يقولي "مش مالك؟"
عني : ازاي مش مضايق ومتعفرت وبتعض في كرش اللي جنبك؟!! 
والفيسبوك بصراحه بعد ما كان كله دلع وهيافه ومسخره بقى رزل ودمه تقيل
مجرد ما بخش و أشوف بس صور البروفايلات بتاعت الناس بيجيلي قولون عصبي
بلاقي في وشي 40 برادعي 
و13 أيمن نور 

و 56 طنطاوي 
و 45 علم ليبيا ومصر وتونس وجزر القمر 
و 1393 حاطين "لا للتعديلات الفوق دستورية" 
أنا بقيت بتلخبط في الناس من الصور اللي شبه بعضها
بعزي اللي عنده فرح ، وببارك للي أخوه اتحرق
وانا بصراحه معرفش ايه التعديلات (الفوق) دستورية دي؟؟؟
 يعني طلعت امتي ولا اتقالت ازاي??انا عملت deactivation لمدة يوم للبروفايل رجعت لقتها
 حد يفهمني ايه التعديلات (الفوق) دستورية دي؟ 
 أنا كل اللي اعرفه الاشعه (الفوق) البنفسجة اللي كان غرانديزر بيطلعها من مناخيره وهو بيقاتل الآلي الشرير قبل ما يشلفط أمه و يجيبله رباط صليبي يقعده بقيت الحلقات في بيتهم 
والله تعبت قوي من البلد دي
ده اللي ميجيلوش اكتئاب فيها يبقى اكيد واحد مكتئب يا إما معندوش دم 
بس كل اللي أنا عارفه دلوقتي انها طالبه معايا موت اخد عربيتي المكسحه عالصحراوي حيث الليل البهيم
 و اسمع المطرب الشعبي اللذوذ عماد بعرور واغنيته الرومانسية (و انا كل ما بحلق دقني بتطلع تاني
سمعتها في توكتوك من يومين وبصراحه حاجه ماستر بييييسس آخر فيصل
./Khaled Bayoumi

2 comments:

Anonymous said...

الله يستر

Anonymous said...

الله يفارس
ربنا معاكم ):

Post a Comment